सोलापूर : ‘शासनाच्या योजना, उपक्रम आणि निर्णयांची माहिती उर्दू भाषिकांना उर्दू लोकराज्य मासिकामुळे त्यांच्या मातृभाषेत मिळण्यास मदत होईल. यासाठी उर्दू भाषक नागरिकांनी व विद्यार्थ्यांनी ‘उर्दू लोकराज्य’चे नियमित वाचन करावे,’ असे आवाहन शमा उर्दू प्राथमिक शाळेचे अध्यक्ष अय्युब नल्लामंदू यांनी केले.
सोलापूरचे जिल्हा माहिती कार्यालय आणि शमा प्राथमिक शाळेने चार ऑगस्ट रोजी उर्दू लोकराज्य वाचक मेळावा आयोजित केला होता. या वेळी विद्यार्थ्यांना मार्गदर्शन करताना नल्लामंदू बोलत होते.
‘माहिती व जनसंपर्क महासंचालनालयामार्फत प्रत्येक महिन्यात उर्दू लोकराज्य मासिक प्रकाशित केले जाते. लोकराज्य मासिकाच्या नियमित वाचनाने लहान मुलांच्या ज्ञानात भर पडेल,’ असे नल्लामंदू म्हणाले. ‘जिल्हा माहिती कार्यालयामार्फत सुरू करण्यात आलेला उर्दू वाचक मेळावा उपक्रम स्तुत्य आहे,’ असे मत उर्दू मित्र डॉ. वळसंगकर आणि पी. पी. कुलकर्णी यांनी व्यक्त केले.
कार्यक्रमाला शाळेचे संचालक पी. पी. कुलकर्णी, उर्दू मित्र डॉ. सतीश वळसंगकर, सचिव अबुबकर नल्लामंदू, मजहर अल्लोळी आणि माहिती सहायक एकनाथ पोवार उपस्थित होते.
‘उर्दू लोकराज्य’चे वर्गणीदार म्हणून शमा प्राथमिक शाळेतील ६० विद्यार्थ्यांनी या वेळी नोंदणी केली.
